جنات: "مفيش مغربي بيحس بغربة في مصر"

جنات

أنا واضحة جدًا ومفيش حاجة مخبياها!

حوار: نهى إبراهيم - تصوير: أحمد توتو

في السطور الجاية حوار خاص جدًا مع النجمة والمطربة جنات المغربية اللي بدأت حياتها الفنية بتغني في مهرجانات الموسيقي في المغرب، وبعدين تم للغناء في مهرجان الموسيقي العربية في مصر، وكانت بداية للانطلاق إلى عالم النجومية والشهرة إلى كل الوطن العربي..

تعالوا نتعرف عليها أكتر..

في البداية.. إيه مكانة المغرب جوا قلبك؟

مكانة المغرب في قلبي أكبر من الكلام، المغرب هي البلد اللي اتولدت فيها وشافت أهم مراحل حياتي من الطفولة ومراحل تكوين الشخصية، ومع كل حب لللمغرب، مكنتش أتخيل إن تربطني علاقة تانية بدولة زي، علاقة بتشمل حب متبادل.

إيه هو سر ارتباطك بمصر ولهجتها؟

سبحان الله، مصر بتحس بأي شخص بيعيش على أرضها، ومصر قدمت لي الكتير، ومن شدة تعلقي وارتباطي وحبي لمصر، العالم بقى يشوفني مصرية، ودي حاجة بفتخر بيها.

إيه وجه التشابه بين مصر والمغرب؟

أنا شايفة إن فيه تشابه كبير بين مصر والمغرب وهو اللي خلاني اتأقلم على الإقامة في مصر بسرعة، وأكتر حاجة متقاربة بين البلدين هو التشابه الكبير بين طباع الشعبين، من حيث أسلوب الكلام وحتى خفة الروح وتشابه العلاقات الانسانية والعلاقات الأسرية المتمثلة في صلة الرحم، وعشان كده مفيش مواطن مغربي بيحس بالغربة على أرض مصر.

 احساسك إيه بتجربتك في مصر خلال السنين اللي فاتوا؟

سنوات إقامتي في مصر هي أهم مراحل حياتي واللي صادف إنها تكون مرحلة الشباب بالنسبة لي، تاريخ إقامتي في مصر حوالي 15 سنة، واللي أحب أقوله إني سعيدة وفخورة بإني بعيش أهم سنين حياتي في أحضان مصر وباستمرار إن شاء الله.

8 سنين هي عمر جنات الفني والأرشيف هو 3 ألبومات فقط، إيه سر تأني جنات في طرح ألبوماتها؟

خطواتي الفنية ماشية بشكل معقول بالنسبة لي، الفترة بين ألبوم "اللي بيني وبينك" وألبوم "حب امتلاك" سنتين، ولكن صدور ألبوم "حب جامد" جه بعد أربع سنين من الألبوم التاني، نظرًا للظروف اللي حصلت في الفترة دي واللي غيرت من حسابات جميع الفنانين حتى في نظرتنا للحياة بشكل عام من ساعة ثورة 25 يناير، وحدوث تغيرات سياسية جذرية وكأنها أحداث أشبه بالزالزال، خاصة إن كانت فيه حالة من عدم الفهم لإمكانية استمرار الفن في مصر خاصة خلال العهد السابق وما قبل ثورة 30 يونيو، المرحلة دي كان فيه قلق حول مستقبل الفن في مصر، وكان إنتاج أي عمل فني خلال لفترة أشبه بالمغامرة وده سر تأخر الألبوم.

بدأتي في التحضير للألبوم الجديد؟

بالفعل بدأت التحضيرات للألبوم الجديد من كذا شهر وبدأت مرحلة تسجيل الأغنيات داخل الاستديوهات، وإن شاء الله هيتم طرحه في الأسواق خلال الصيف.

إيه هي طقوس جنات خلال تحضير الألبوم؟

التحضير للألبوم مرحلة طويلة بتشمل مجموعة من الناس، بداية من شركة الانتاج اللي بتبدأ بعقد الاجتماعات مع الشعراء والملحنين، ومن بعده بنبدأ رسم خط موسيقي للألبوم بالكامل ودي المرحلة اللي بيظهر فيها دور الموزعين الموسيقين، لحد ما بنوصل لمرحلة تسجيل الصوت داخل الاستديو ودي المرحلة الأكثر إرهاقًا.

أغنية "أولاد وبيت" طرحت فكرة جديدة في عالم الأغنية العربية واللي غنيتي فيها عن مشكلة تأخر الإنجاب، منين جت فكرة الأغنية ؟

الفكرة جت من خلال صديق وهو ملحن، كان بيسمعني لحن أغنية اولاد وبيت بكلمات تانية رومانسية، وبعد العمل حكى لي عن معاناته في الفترة دي بسبب تأثر زوجته بتأخر الإنجاب، وكان رد فعلي هو إن لازم نكتب القصة في أغنية تعبر عن حال الكتير من الناس.

هل صناعة الغناء في خطر بسبب تعرض معظم المنتجات الغنائية للقرصنة؟

على أرض الواقع هناك شبه اختفاء لشركات الإنتاج الغنائية والفنية بسبب القرصنة، وهو اللي أثر في قلة ظهور نجوم وقلة ظهور عمليات صناعة النجوم الكافي.

 في رأيك إيه الحل للحفاظ على الأعمال من القرصنة؟

الحل متمثل في وجود قانون يحمي الأعمال الفنية من القرصنة على الإنترنت، وده بالفعل تم إقراره في الدستور المصري الجديد، لكن نتمنى تطبيقه.

إيه علاقة جنات بمواقع التواصل الاجتماعي؟

زي ما في ضرر من الإنترنت بسبب القرصنة، فيه فايدة، وعلى قد الخسارة المادية اللي لنتلقاها بسبب القرصنة على قد سعادتي باللي بيوفره الإنترنت كوسيلة للشهرة والانتشار، واختصار للوقت، زمان كنت ممكن نستنى سنين من أجل تحقيق شهرة، حاليًا تقدر تتشهر شهور في بفضل الإنترنت.

هل بتهتمي بمتابعة اللي بيتقال عنك بشكل سلبي أو إيجابي على الإنترنت؟

دايمًا بأحرص على متابعة كل ما يقال عني على الإنترنت وشبكات التواصل الاجتماعي، ومع مرور الوقت بتتكون الخبرة لفهم الفرق بين النقد البناء والنقد الفارغ.

 إيه هو حلم جنات؟

حلمي الدائم هو إن ينعم ربنا عليا بالصحة الدائمة، وبسأل ربنا كل يوم إنه يبعد عني الأمراض المفاجأة.

إيه اللي اتغير في جنات خلال 8 سنين فن؟

الانسان تلقائيًا بيتغير كتير من مرحلة لمرحلة بسبب الخبرة والتعامل مع الناس، واللي اتغير فيا  أكتر من حصره في نقط محددة، ولكن أكتر حاجة حبيتها في التغيير هو اكتاسبي الصبر وبقيت أقل عصبية، بالإضافة عن بعدي إني أتخذ قرارات سريعة وبقى عندي طولة بال.

صرحتي قبل كده إنك ممكن  تخوضي تجربة التمثيل، إيه هو العمل اللي بتنتظره جنات؟

أتمنى ظهوري للناس كممثلة في إطار عمل رومانسي أكشن، وهو ده الإطار اللي ظن إني موهوبة فيه، مع إني لا أظن إني أكون موهبة في الكوميدي ولكن الله أعلم، كل واحد فينا يمتلك مواهب كتير جواه لسة مايعرفهاش!

إيه هو المردود المختلف من نجاح أغاني تترات المسلسلات عن نجاح الأغاني التانية؟

التترات بتختلف كتير عن الأغنيات السينجل، من حيث ارتباط التتر بالمسلسل وهو بيخليه يعيش مدة أكبر بين الناس، لكن الأغنية السينجل بتكون قريبة من شخصية المطرب أكتر.

إيه الجانب اللي محدش من الجمهور يعرفه عن جنات؟

أنا واضحة جدًا ومش بأخفي أي شئ، تقريبًا مفيش حاجة.

محررة بوصلة مع جنات