الصندوق الأسود طلع أحمر!!

حوار: نوره الدسوقى

كتير من الناس بيخاف من ركوب الطيارت، وفي كل الأحوال الكل بيسأل نفسه في البداية والنهاية، إزاي الطيارة بتطير!  تعالوا نعرف من خلال الملف ده ونظهر ليكم بالصور إزاي بيتم صناعة الطيارات، وبالأخص الكبيرة.. تعالوا اقرأوا حوارنا مع الكابتن شريف..

 

محرره بوصلة تحاور الكابتن شريف

إيه هي أجزاء الطيارة ؟

1ـ الجناح

    2ـ الهيكل (الجسم)

    3ـ مجموعة الذيل

    4ـ جهاز الهبوط

    5ـ المحرك

إيه اللي بيبقى موجود جوا غرفة القيادة؟

في غرفة القيادة موجود كرسي الطيار وبعض التجهيزات اللي بتساعده على القيادة و تنفيذ مهامه مثل البدالات (الدواسات) وبتضم برضه أجهزة للأتصالات وتوضيح خط الطيران ومسار الرحلة ، وأجهزة لتسجيل الأصوات وتلقي إشارات الرادار وأجهزة تانية للطيران الآلي اللي بيمكن الطيارة من الطيران في الجو تلقائيًا بدون تدخل الطيار، كل اللي عليه إنه يدي المعلومات لجهاز الطيران الآلي اللي بيقوم بتسيير الرحلة أو الهبوط في المطارات أو تغيير اتجاه الطيران في الجو وده بيكون مفيد جدًا مع وجود الضباب الكثيف وسوء الأحوال الجوية .

ومن الأجهزة المهمة اللي في غرفة القيادة :مقياس الارتفاع اللي بيدي الطيار فكرة عن ارتفاع الطيارة عن سطح البحر. ومؤشر سرعة الطيارة في الجو، ومؤشر الوضع الأفقي اللي ليحدد موضع الطيارة،  والمؤشر اللي بيوضح طيران الطايرة باستواء واستقامة، وبتحتوي غرفة القيادة على محطة اتصالات لاسلكية بتخلي الطيار على اتصال مع طاقم الطيارة وبرج المراقبة من جهة وبالعالم من جهة.

وبتضم المحطة دي معدات راديو ورادار معقد لتمكن الطيار من الحديث مع مراقب الملاحة الجوية الموجود في المطار وتمكنه من الإتصال مع الطيارات التانية في الجو وفي غرفة القيادة برضه وحدة رادار مهمتها سلامة الطيارة وهي بتراقب مسافة 250 كلم قدام الطيارة وبتدي صورة للحالة الجوية في مسار الطيارة وبتحذر الطيار من العواصف والغيوم وما إلى ذلك.. وبيغطي غرفة القيادة غلاف زجاجي مزدوج وعلى عدة طبقات بيتسمى الهود  .

ما هو الصندوق الأسود؟

يوجد في كل طائرة صندوقان وليس صندوق واحد يقعان في مؤخرة الطائرة يسجلان ما يحدث للطائرة طول فترة سفرها.

  -  الصندوق الأسود الأول :

وظيفته حفظ البيانات الرقمية والقيم الفيزيائية (الوقت، السرعة، الاتجاه).

    وأما الصندوق الأسود الثاني :

فوظيفته تسجيل الأصوات (مشاحنات، استنجاد، حوارات).

الصندوقان مجهٌزان ببث غوص يندلع إذا ما غاصت الصناديق في الماء وتطلق إشعارا فوق الصوتي للمساعدة على العثور عليهم. يبث هذا الإشعار على ذبذبة 37,5 كيلوهرتز ويمكن التقاطة في عمق يبلغ 3500 متر (14000 قدم)..

إزاي توصف أول تجربة طيران ليك؟

التجربة الأولى كانت الإختبار الأكبر في حياتي خصوصًا إن الخطأ ممنوع، في الطيران الغلطة الأولى هي الغلطة الأخيرة، عشان كدة عملت كل اللي اتعلمته بحذافيره، ونجحت في الوصول بسلام من القاهرة لبيروت!

إيه الصعوبات اللي واجهتها؟

كانت صعوبات كتير، بداية من المحيط العائلي، واجهت معارضة شديدة من والدتي عشان مهنة الطيران حواليها مخاطر كتير، وصعوبات على المستوى العملي، لكن التدريب والخبرة وإندفاعي للشغل شال حاجز الصعوبات والخوف، لكن أنا فاكر حادثة خلتني أترعش من الخوف، كنت مرة بهبط على مدرج مطار بيروت وفقدت السيطرة على الطيارة واصطدمت بعائق رملي، لكن مرت بسلام الحمدلله.

إيه هي الإيجابيات التي خدتها من المهنة؟ سواء على المستوة المادي، أو الإجتماعي أو المعنوي؟

هبدأ وأقول إن مهنة الطيران بيقابلها خطر الدايم، عشان كده الاستفادة منها كتيرة فعلى المستوى المادي تحسنت أوضاعي المادية جداً لإن مرتبات الطيارين عالية، وبرضه استفدت على المستوى الإجتماعي، وعلمني الطيران الشجاعة وقوة الشخصية والثقة العالية بالنفس، إضافة إلى المسؤولية والدقة والتأني.

إزاي كسرت حاجز الخوف؟

الخوف شئ طبيعي في أي شغل، اللي مش بيخاف يإما بيكذب أو مجنون، لكن الخوف بيقل مع سنين الخبرة والقدرة على مواجهة المشاكل مهما كبرت، والثقة العالية في النفس وقوة الشخصية والإحساس بالمسؤلية، كلها حاجات بتساعد على تحدي الخوف.

إيه الصفات اللي لازم تكون في اللي ناوي يدرس طيران؟

الطيّار لازم يكون عند صفات مهمة زي الشجاعة والقدرة على التعامل مع أصعب الظروف ولازم يكون صبور ويعمل شغله بشكل متأني، ويكون سريع البديههعشان يتعامل مع أي حاجة طارئة بنجاح، وده إضافة إلى صفات جسدية زي النظر والسمع، وصولاً إلى قلب سليم، ودايماً لازم يخضعا للفحوصات الطبية اللازمة عشان يتأكد من سلامته العامة.

احكلنا رحلة ليك كانت صعبة؟

كنت في رحلة متوجه من الرياض لبروكسل في بلجيكا وعادةً  بيكون في كل رحلة مطار بديل للهبوط في حالة تعذر الهبوط في المطار المتوجهين ليه، وكانت حالة الجو وحشة جدًا والرحلة كانت في الشتاء وحالة الطقس في أوروبا عامة أمطار وتساقط ثلوج والرؤية بتكون صعبة، وأول ما وصلنا مطار بروكسل حاولنا الهبوط أكتر من مرة ومعرفناش، والخبر السيء إن المطار البديل (باريس) كانت الرؤية متدنية جداً قررنا التوجه لمطار فرانكفورت (ألمانيا) لكنلمشكلة إن وقود الطيارة مش هيساعدنا للوصول لفرانكفورت، لكن الحمدلله قدرنا الهبوط بسلام وكانت الرحلة دي من أصعب الرحلات!

إيه معنى الطيار الإليكتروني؟ 

الطيار الآلي أو الإليكتروني هوبيستخدم لإرشاد الطيارات وتوجيهها بدون الحاجة لمساعدة بشرية وهو جهاز بيتبع التعليمات المدخلة ليه من الطيار عن طريق الكمبيوتر الخاص بيه، ظي تحديد الارتفاع والسرعة وبنقوم بتشغيل الطيار الآلي بعد الإقلاع تقريبًا بـ 500 قدم وبيتم فصله قبل الهبوط بـ 1000 قدم وفي بعض المطارات بنقدر الهبوط بالطيار الآلي.

إيه سبب تأخير الإقلاع في كتير من الرحلات؟

أسباب كتيرة منها: عجز في الطيارين، عجز شديد في موظفي الصيانة، قلة عدد الطائرات، المسافرين وعدم التزامهم بالمواعيد والترتيب المبكر للرحلة.

بتقضي أجازتك داخل مصر ولا برة؟

برة مصر

هل كانت دراسـة الطيران من ضمن أولويات حياتك الدراسـية؟

كانت ضمن أولوياتي من المرحلة المتوسطة والحمدلله ان ربنا حققلي رغبتي.

هل بتقدروا تشوفوا التليفزيون وتتابعوا الأخبار وأنتم في طبقات الجو العليا؟
لأ، الطيار بيكون مشغول في كبينة القيادة بالإتصال ببرج المراقبة واتباع تعليمات خط سير الرحلة.

إيه تأثير الرحلات على عائلتك وأصدقائك؟

مجال عملي بيبعدني عن كتير من أصحابي وقرايبي بحكم تواصل الرحلات بشكل يومي، على مستوى العائلة، أعباء البيت أغلبها بتقع على الزوجة من ناحية تربية الأولاد والتدريس ليهم، أما الأصدقاء فبقابلهم كل فترة.

إيه هو استعدادك للرحلة، نفسيًا وفنيًا وبدنيًا؟

في شوية إجراءات لازم اتباعها عشان ضمان سلامة المسافر والطيارة، لازم على كل طيار التواجد قبل إقلاع أي رحلة بساة ونص عشان يعرف حالة الطيارة وكم مدة الرحلة والتشييك على الطيارة من جميع النواحي، وبعد كده البدء في استقبال المسافرين وتوزيعهم على حسب بطاقة صعود الطيارة ودي مهمة المضيفين وبعد المرحلة دي بيتم الإقلاع وده بيحصل من غير تدخل من أي أجهزة زي ما بيعتقد البعض بإن هناك طيار آلي هو اللي بيقوم بالإقلاع لكن الحقيقة، إن الطيار هو اللي بيقوم بده، وبعد الوصول إلى الارتفاع المقرر ليتم تشغيل الطيار الآلي مع وجود الطيار داخل مقصورة القيادة في حال حدوث أي شي لا قدر الله وبيتم ده لحد الوصول لنقطة الهبوط، وهنا يجي أهم مراحل الرحلة، يعود الطيار لقيادة الطيارة والهبوط بها.

فيه فوبيا عند بعض المسافرين من الطيران، إزاي بتتعامل مع المشكلة دي؟

ده شيء يعتبر طبيعي وبتحصل عند بعض المسافرين، وبيتم التعامل مع الموضوع من خلال المضيفين.