حدد اتجاهك..

 كتبت : نهي ابراهيم 

بوصلة , حدد اتجاهك ... 3 كلمات في مواجهة حضراتكم و في انتظاركم مع النظرة الاولي للمدونة , و اللي اخترناهم ك رمز و اسم و شعار لينا, و في الواقع ان بسبب الكلمات الثلاثة دول كانت اولي التعليقات من اغلب الناس هي : اشمعنا بوصلة؟ و ليه حدد اتجاهك؟؟! و اللي بالنسبة لنا اثارة الاسئلة دي في حد ذاته نجاح و تميز و اختلاف..

بس اتمني انكم تسمحولي باعتباري عضوة من فريق العمل و الهيئة التحريرية اني اوضحلكم جزء من حكاية حدد اتجاهك , اولا علشان نكون متفقين من البداية و الاهم ان يكون عند حضراتكم فرصة اكبر لتصفح موضوعات اللي كانت نتاج لجهد متواصل علي مدار سنة كاملة.

حدد اتجاهك كانت الترجمة المنطقية لكلمة بوصلة و اللي وظيفتها الاساسية تحديد الاتجاه , بس مكنش المقصود بها اننا المسئولين عن تحديد اتجاهك , و لكن الموضوع انطلق من واقع كلنا بقينا عايشينه , واقع بيعكس اعلام بقي اغلب الوقت متشتت و متلون و غير مباشر , و ده اللي انعكس في كم الاراء اللي بقت بتطرح و ما فيها من لغط و كثافة , لحد ما اغلبنا بقي بيشعر بالضياع , بالضياع عن الطريق عن الاتجاه..

هدفنا مش اننا نحركك في طريق معين , بالعكس احنا بنحاول ندور معاك علي الطريق , و حاولنا نطرح لك كافة المجالات و الاتجاهات بموضوعية و حيادية و تنوع , علشان انت بايدك تختار اتجاهك و تقدر تحدده بعيدا عن زحمة و تشتت الاراء..

اتجاهك تقدر تحدده لما تكتشف صرح عظيم زي مؤسسة مجدي يعقوب لامراض القلب في اسوان و تشوف تجربة من احلي و اروع ما تم تحقيقه علي ارض بلدك, اتجاهك تقدر تحدده لما تروح معانا لمدينتين اتنسوا وسط زحمتنا و هما حلايب و شلاتين و لأول مرة تشوفهم بعينك و تتعرف علي حتة من وطنك , اتجاهك تقدر تحدده لما تقدر تدخل عالم مغلق زي سجن النسا و تتعرف علي كل عضو بينتمي للمكان ده من المأمور لل سجانات و حتي للمسجونات , تقدر تحدد اتجاهك لما نتعرف علي عالم صناعة السينما المصرية اللي كلنا بنحلم له بواقع اقرب للصناعات السينما العالمية..

اكيد يهمك تتعرف علي اتجاهات فنية لانماط متنوعة من الفنانين من المطرب الخليجي الانجح في مصر حسين الجسمي , و الكوميديان اللي دايما نادر الظهور محمد هنيدي , و مطربة صاعدة من المغرب زي جنات , و الفريق الانجح بين الشباب كايروكي و فنانة بقيمة مني زكي , دي كلها طرق متنوعة و مختلفة و متميزة لو كنت من هواه الفن..

و لو كنت شاب مجنون بالرياضة ف قدامك معانا في رحلتنا 3 نماذج لللاعبين من اكبر ثلاث اندية في مصر تفهم من خلالهم اتجاهك في الجانب ده , و علشان تكمل الصورة عرضنا اراء مسئولين سواء علي مستوي الدولة في الرياضة و علي رأسهم وزير الشباب و الرياضة , او علي مستوي الاندية و القطاعات زي رئيس النادي الاهلي ..

وفي رحلتنا من شرق مصر ل غربها اللي حاولنا فيها نقدم لحضراتكم نماذج منها زي قناة السويس الجديدة , كان واجب اننا نعرض نماذج غير , من اماكن مختلفة , وشعب تاني و ثقافة وحضارة بعيدة عننا , كان يسعدنا نعيشك معانا تجربة التعليم في النمسا , و نعيش في المدرجات مع الالتراس الالماني , و نحلم و نطير في ليالي الانس في فيينا...

دي مش بس موضوعاتنا و لا انا كنت بحاول اعمل عملية حصر و لا فرد عضلات , بالعكس! احنا هنفضل علي تأهب للتعرف علي ارائكم في رحلتنا اللي قمنا بيها و عايزينكم انهاردة تشاركونا كل موضوع فيها , تنقدوا و تعلقكم علي كل تفاصيلها , علشان نقدر مع بعض نحدد الاتجاه و نوحد الهدف حتي لو اختلفت الطرق .. :) 

مرحبا بك في بوصلة