حوار: نوره الدسوقى
أحمد مالك مصطفى، ممثل مصري شاب شارك في كتير من
الأعمال الفنية زي فيلم "مفيش فايدة" ومسلسل "أحلامنا الحلوة"،
لكن انطلاقته الحقيقية كانت في رمضان 2010 لما قدم شخصية "حسن البنا"
صغيرًا في مسلسل الجماعة، واتفق النقاد والجمهور على براعته فى الأداء بالرغم من
صعوبة وحساسية الدور اللي بيتعرض لطفولة
مؤسس جماعة الإخوان المسلمين.
ظهر بعد كدة في دور أحمد في مسلسل "مع
سبق الإصرار" سنة 2012، ودور أدهم في مسلسل "حكاية حياة" سنة 2013.
في الحوار هنتعرف على إزاي قدر
يجمع بين الدراسة والسياسة والأعمال الفنية، وليه اتقبض عليه بعد رفضه لبراءة
مبارك والعادلي، وايه أعماله اللي جاية..
إنت بتدرس إيه؟
أنا طالب في كلية الإعلام
إزاي بتقدر تعمل توازن بين دراستك
ومشاركتك في الأعمال الفنية؟
بحاول على قد ما أقدر التوفيق بين
دراستي وأعمالي الفنية، وعندي القدرة على الجمع بينهم من غير ما توقع واحدة فيهم
التانية.
إيه أخبار الحب والارتباط في حياتك؟
خاصة إن ليك معجبات كتير؟
أنا مركز في دراستي وشعلي وسايب الموضوع
ده لوقته وبتعامل مع الكل من منطلق الصداقة والزمالة في العمل أو الدراسة أما
المعجبات فشيء جميل إن يكون للفنان معجبين ومعجبات يقدر من كلامهم وانتقاداتهم يعدل
خطواته.
كلمنا عن ممارستك للسياسة والتعارض
بينها وبين الفن، خاصة بعد خروجك في مظاهرة لرفض قرار براءة مبارك وتم القبض عليك؟
اتقبض عليا بالفعل لكن محدش اعتدى
عليا، وأفرج عني من القسم بعد ما قدمت إثبات الشخصية وثبت إني مش متورط في أحداث
عنف أو اختراق للقانون، وخروجي كان للتعبير عن غضبي من القرار لأن مبارك وحبيب
العادلي ومساعديه في نظري مجرمين وأخطأوا في حق مصر والمصريين ودم الشهداء متعلقة
في رقبتهم في الدنيا والأخرة حتى لو برأتهم المحكمة، عشان ماجتش عفاريت أو كائنات
من كوكب تاني وقتلت الشباب والبنات في التحرير وميادين مصر في 25 يناير، مع كامل
احترامي لأحكام القضاء!
مين مثلك الأعلي، وإزاي شايف
مشاركتك في الجزيرة 2؟
مثلي الأعلى أحمد السقا، وبرضه اتأثرت
كتير بنصايح الراحل خالد صالح كثيراً، وبشوفه عملاق رحل عنا قبل أن يدينا الكتير
من مخزونه الفني والإبداعي، أما فيلم الجزيرة 2، هو محطة أضافت ليا كتير واتعلمت
منها عشان اتاحت ليا الاحتكاك بمدرسة إخراجية كبيرة اسمها شريف عرفة وأتمني أن
يكون بداية جديدة ليا للانطلاق لأعمال تانية ناجحة.
انت شايف نفسك محظوظ فنيا بأداء
أدوار ناجحة في سن صغير؟
بالطبع شايف نفسي محظوظ، أنا شاركت
في أعمال ناجحة جماهيرياً ونقدياً مسلسل "أحلامنا الحلوة" مع فاروق الفيشاوي ونرمين الفقي
وكان عمري وقتها 10 سنين، ومثلت دور حسن البنا في مسلسل “الجماعة” مع إياد نصار
وأحمد الفيشاوي اللي من تأليف السيناريست الكبير وحيد حامد، واشتركت في "الشوارع
الخلفية" مع ليلى علوي وجمال سليمان، وقدمت عملين متتاليين مع الفنانة غادة
عبد الرازق ومجموعة كبيرة من النجوم في "مع سبق الإصرار" و"حكاية
حياة"، بالإضافة إلى أفلام"مفيش فايدة" و"جدو حبيبي" ومؤخرًا
"الجزيرة 2".
ليست هناك تعليقات:
إرسال تعليق