أبله فضيلة : العيال
دلوقتي مش متربيين كويس!
حوار:نوره الدسوقى
أبلة فضيلة.. ربت أجيال كتير من
خلال الراديو ومن خلال حواديتها اللي كانت كلها قيم جميلة، أي مقدمة عنها مش
هتوفيها حقها.. فتعالوا نقرأ الحوار الخاص ده معاها..
هل في فرق بين أطفال التسعينيات
والأطفال دلوقتى؟
الأولاد دلوقتي أكثر ذكاءً من ولاد
التسعينات، العيال دلوقتي مفتحين وأكتر جرأة وقلة أدب، مش متربيين كويس!
أيام التسعينيات وما قبلها كنا
مؤدبين يعنى لما "بابا" يدخل علينا كلنا نقف لغاية ما هو يقعد على
السفره ونقعد بعده وعلى طول نقول حضرتك، دلوقتي الوضع مختلف!
رأيك إيه في الأغاني اللى بتتقدم للأطفال الفترة
دي؟
مش بحب أبداً بوس الواوا والكلام
ده! دى مش أغانى أطفال، بقى معقولة الأغاني دى تتساوى مع «يا ولاد.. يا ولاد» اللي
عملتها صديقتى أبله عطيات عبدالخالق المدرسة فى معهد الموسيقى، ده حتى الريس لما صفوت
الشريف مرة كان بيقدمنى له فى حفل تكريم وبيقوله دى أبلة فضيلة، قاله أيوه يا سيدى
دى عندها نشيد قومى ماعنديش زيه، فقلت له هو إيه ده يا فندم؟، فقال: يا ولاد.. يا
ولاد!!
إيه رأيك في التليفزيون والفضائيات
وقنوات الأطفال؟
أنا مش بحب أشوف برامج
الأطفال فى التليفزيون، ولا الفضائيات، ولا أعرف عنها حاجة، ولا عاوزة أعرف، مش
بتعجبنى حقيقى، أحفادى بس لما بيجوا عندى بيتفرجوا على الكرتون وبس، ده حتى أنا
رفضت أقدم برامج أطفال فى التليفزيون، علشان الأطفال لما بيسمعونى فى الراديو
بيفتكرونى من سنهم، وأنا مش عاوزاهم يشوفونى ويعرفوا إنى كبيرة، أنا عاوزة معنى
ومغزى الحدوتة يوصل لهم من غير ما يحسوا إنى حد كبير بيوعظهم.
رأيك إيه في الإعلانات اللي بيقدمها
الأطفال على بعض الفضائيات، ومشاركتهم فى الأفلام؟
أى حاجة تقتل براءتهم مرفوضة،
طبعاً الإعلانات دى مؤسفة، وفيه واحدة بنت بتتكلم زى الكبار وبتلبس وبتفكر زيهم
اسمها "منة عرفة"، صدقونى يا ولاد لما بشوفها بتعب أوى وبضايق!
أول مرتب قبضتيه كان كام؟ وعملتي بيه
إيه؟
أول مرتب أخدته كان 12 جنيه وكان
مبلغ كبير لاننا كنا في الإذاعة كان مرتب يعادل القطاع الخاص وفرقت نصه على الغلابة
والنص الثانى جبت شيكولاتة وحلويات.
مين أشهر الفنانين اللي عملتي
معاهم لقاءات؟
أهمهم السيدة «أم كلثوم» ولما رحت
لمقابلتها رفضت إجراء اللقاء وقالت لي "أنا حبيتك بس أنا أم كلثوم لما يتحط
الميكرفون قصادى أغنى" فقلت لها: طب غني، وفعلًا غنت وأنا قدمتها كأنها في
حفلة وهي كانت مبسوطة جداً منى.
تقولى لمين يا حبايبى الحلوين؟
لولاد مصر.. كلهم حبايبي، كلهم
تعبانين، جوا مصر نايمين فى الشوارع، وبرة مصر بيتضربوا بالشباشب.. صعبانين عليا أوي!
إزاي نقدم حواديت مؤثرة في الأطفال
مع التغيرات اللي بتحصل في المجتمع؟
نطورها بأننا نعرض نماذج غير قابلة
للتلاشي، وإننا نؤكد ليهم إن من يفعل الخير مهما تغير الزمن، سيكون الأفضل
والأصلح، ومن يكذب أو يفعل شيء سيء سيعاقب وسيحاسب، وإذا لم ينل عقابه في الدنيا،
سيناله في الأخرة.
إيه تفسيرك للتغيير اللي حصل للأطفال
المصريين ومن المسؤول عن ذلك التغير؟
المسؤول الأول هم الأهالي.
مع التطور التكنولوجي هل تتوقعي
اختفاء الإذاعة؟
لا، لأن الراديو بيخلق عالم جديد
ومختلف، وبيساعد على تنمية ملكة الخيال، وممكن يكون للراديو أهمية أكبر لو اهتمينا
بيه.
ليست هناك تعليقات:
إرسال تعليق