السولية: لن ألعب في مصر لغير الإسماعيلي!

محررة بوصلة مع لاعب الاسماعيلي عمرو السولية

حوار : نهى إبراهيم

ابتسامته البشوشة اللي  كانت حاضرة طول مدة إجراء الحوار معاه، خلى الوقت يمر معاه في خفة تشبه تمامًا خفته في لمساته للكرة..
عمرو السولية لاعب كرة القدم المصرية بنادي الإسماعيلي والمنتخب المصري، واللي قدر إنه يسجل اسمه كواحد من نجوم الكرة في مصر رغم صغر سنه اللي مش بيتعدى 25 سنة..
السولية من أبناء محافظة المنصورة، واتوصف بإنه واحد من أفضل لاعبي الوسط في مصر لامتيازه بقوة التصويب، وكان يستحق إننا نروح ليه في استاد محافظة الإسماعيلية عشان نعمل مع الحوار ده..

- في البداية عايزين نعرف إزاي اسمك بدأ يتعرف في الوسط الرياضي المصري؟
كانت البداية وأنا 10 سنين في نادي بلدية المحلة واللي حالفني الحظ من خلاله إني ألعب ماتش  قدام الإسماعيلي، وكان الماتش ده سبب في اختيار مدرب الإسماعيلي ليا، وبالفعل انتقلت للإسماعيلي، وبدأت الانطلاقة الكروية من خلاله، وكان عندي 12 سنة ومع ذلك كنت دايمًا بألعب وأتدرب مع الفرق الأكبر مني في العمر، لحد ما صعدت للفريق الأول وأنا في عمر 16 سنة.

- كلمنا عن مشوارك مع المنتخب الوطني؟
بدأت مشواري مع المنتخب الوطني من خلال منتخب الناشئين وإن كان لم يحالفني الحظ وقتها في اللعب مع منتخب الشباب، وبدأت رحلتي مع المنتخب من خلال الكابتن حسن شحاتة.

إيه شعورك لما عرفت إنع تم اختيارك لدخول المنتخب لأول مرة في عهد حسن شحاتة؟
حسيت بالإنصاف أمام التجاهل اللي قابلته خلال تجربتي مع منتخب الشباب والمنتخب الأوليمبي، وحسيته كرم من عند ربنا.

- اتدربت تحت قيادة كل من حسن شحاتة وبرادلي وشوقي غريب في المنتخب، إيه الفرق بينهم؟
الفرق كبير بين المدرب الأجنبي والمدرب المصري بصفة عامة، المدرب المصري بيكون على علم بكل ما يخص اللاعب وطباعه وامكانياته، وبتكون لديه القدرة دايمًا على التعامل مع اللاعب والتدخل لحل مشكلاته أكتر من المدرب الأجنبي.

- لو جاتلك الفرصة للاحتراف في الخارج، إيه هو العرض اللي تتمناه؟
بصراحة أنا من عشاق الدوري الإسباني، وبالأخص ريال مدريد، لأني شايف إن الدوري الإسباني هو الأقرب للفكر اللي بتبعه في لعب الكرة.

- سمعنا عن عروض جتلك من إسبانيا وإيطاليا، إيه صحة الكلام ده؟
فعلاً كان فيه عرض من نادي "فيا ريال" من فترة ومن خلال العرض ده قمت بالسفر لمدة أربع أيام لتدرب مع الفريق، وطرهت بمستوى جيد بشهادة القائمين هناك، وتم الاتفاق بينا على إرسال بعض الأشخاص من النادي لمصر لمشاهدة مبارياتي مع الإسماعيلي بصورة مباشرة في الوقت المفترض فيه إننا كنا بنستعد لخوض الدورة الرباعية، وفشلت الصفقة بسبب إلغاء الدورة الرباعية أصلاً!


بتشوف تجربة اللاعب محمد صلاح في الاحتراف بالخارج إزاي؟
صلاح أصغر مني سنة وأنا حالفني الحظ باللعب معاه، وشايف إنه يستحق أكتر ما وصل ليه، ومن ساعة لقائي بيه في المنتخب كنت شايفه من أكتر اللاعبين فكرًا داخل الملعب، بويقرب كتير من الأستايل الأوروبي في طريقة اللعب، ومن وقتها قلت له إنه هينتقل لأحسن الأندية في أوروبا.

إيه موقفك من سعي النادي الأهلي للحصول عليك؟
بالطبع النادي الأهلي نادي كبير وجمهوره جمهور عظيم، لكن أن لاعب في الإسماعيلي صاحب الفضل عليا بعد ربنا سبحانه وتعالى، ومن صغري وأنا بن الإسماعيلي، وأتمني خلال الفترة اللي جاية بإذن الله، إني استمر مع الإسماعيلي وتكون الأولوية للتجديد للنادي الإسماعيلي.

مين أفضل لاعب لعبت جنبه؟
أحب أتكلم عن الكابتن محمد أبوتريكة لأنه لاعب على خلق عالي ودايمًا مشرف مصر في كل البطولات ولياقته كانت متجددة ومستواه عالي لحد اعتزاله، ومن خلال تجربتي مع تريكة في المنتخب شفته إنسان شديد الاحترام ودائم العطاء لكل لاعب جديد منضم للمنتخب، وإداني ثقة كتير.

- مين كان مصدر إلهامك ومثلك الأعلى؟
بصراحة جوا مصر أنا بحب كابتن حسني عبدربه والكابتن حمص وباعتبرهم بمثابة مثل أعلى لكل اللاعبين في مصر، أما في الخارج فأنا بحب عدد من اللاعبين في الدوري الاسباني ومنهم ألونسو.
في رأيك إيه اللي بينقص الكرة  في مصر؟
إحنا ينقصنا كتير،فكل مشكلة بتحصل جوا البلد بتعود بالتأثير السلبي علي الكرة المصرية والرياضة في مصر بصفة عامة، بينقصنا النظام الموحد اللي المفروض تمشي عليه كل الأندية، وأكتر حاجة بنعاني منها هو انعدام الاحترافية في التعامل داخل الأندية الرياضية.

 - إيه أكتر ماتش ليك مش بتنساه؟
بأفتكر دايما أول ماتشاتي في الدوري الممتاز وكان قدام نادي الزمالك وكانت أول مباراة أجيب فيها جول في شباك الزمالك.

إيه الصعوبات اللي واجهتك خلال مشوارك الكروي؟
أصعب شئ واجهني كان تكرار الإصابات واللي كان عائق قدامي لاحترافي في الخارج لأكتر من مرة، ولكن الحمدلله على كل شئ، وجودي داخل الإسماعيلي دايمًا إضافة كبيرة ليا.

إيه هي خططك للفترة اللي جاية؟ ؟
بصراحة أنا بأفكر في الاحتراف ولو بصورة مؤقتة علي شكل إعارة، وفي الحالة دي يقدر النادي الإسماعيلي يستفيد من إعارتي للخارج في نفس وقت استفادتي منه.

عمرو السولية