طارق مصطفى كامل.. صانع المؤثرات العبقري الذي لم يأخد حقه!

حوار:نوره الدسوقي

 محرره بوصلة تحاور طارق مصطفى

 شخصية خالد الصاوى فى الفيل الأزرق استغرقت أسابيع وأجهدتنى جدًا   !

طارق مصطفى كامل.. باختصار هو "صانع التاتو فى فيلم "الفيل الأزرق".. وشارك فى "flight of the phoenix" و"the ring".. ورسم "ديجا" وعمل ماسك "يانا يا خالتي" و"الكبير أوى"!

طارق اتخرج من كلية فنون جميلة قسم فنون متحركة، وسافر لجنوب أفريقيا، وتخصص فى المؤثرات، واشتغل هناك فى شركة CFX واشترك معاهم فى صناعة أكثر من فيلم من إنتاج هوليود، زي "flight of the phoenix" و"the ring" وبعدين رجع مصر فى 2003، وبدأ يشتغل فى المؤثرات الخاصة، وتخصص فيها، وشارك مؤخرًا فى فيلم "الفيل الأزرق" بصناعة التاتو للشخصيات المشاركة فى الفيلم.

قررنا ندور عن العبقرى الذي صمم التاتو في الفيلم، عشان نعمل معاه حوار.. تعالوا نتعرف عليه أكتر..

-        صورة للفنانة إلهام شاهين انتشرت على الانترنت وظهرت كأنها قامت بحلق شعرها، ولكنك صرحت بأنها لم تقم بحلق شعرها.. إيه اللي ورا الصورة؟

 الفنانة إلهام شاهين فعلا لم تحلق شعرها، وقمت أنا بعمل خدعة بصرية عشان دورها فى فيلم "ريجاتا".. فصدقها الجمهور وأنا سعيد بالنجاح ده!

-       إزاي عملت كدة؟

إلهام شاهين فى الفيلم بتقوم بدور امرأة مصابة بمرض خبيث وهو "السرطان"

وقمت بعمل خدعة لإخفاء شعر الرأس، عشان تظهر للجمهور وكأنها قامت بحلقه، نتيجة لتناولها للعديد من الجرعات الكيماوية التي تسببت فى سقوط شعرها بالكامل، وقمت بعمل الخدعة بجودة ودقة وإتقان فنجحت وصدقها كل الجمهور! ولكن إلهام شاهين لم تشير إلى أنها استعانت بيا فى عمل الخدعة البصرية دي.

-       مين هو أول ممثل قمت برسم تاتو ليه؟

الفنان أحمد مكي، فى فيلم "لا تراجع ولا استسلام، فى شخصية "أدهم"، وعملت معاه شخصية الكبير أوى

-       إيه هو أول فيلم شاركت فيه في مصر؟

 فيلم "يانا يا خالتى" في مشهد خاص بالماسكات، وبعدين  شاركت فى فيلم "ويجا" و"خيانة مشروعة" و"أيظن"، على الرغم من كل ده إلا إني بقالي عالم الفن أكتر من 10 سنين، ومحدش عمل معايا حوار صحفي غير جريدة اليوم السابع!

-       إزاي تم اختيارك للعمل فى فيلم "الفيل الأزرق" وهل يوجد علاقة صداقة بينك وبين أحمد مراد؟

لا تربطنى صداقة بأحمد مراد، سواء قبل اختيارى للـ "الفيل الأزرق" أو بعده، وحتى أثناء التصوير مشوفتوش غير مرة واحدة، دايمًا كنت بتواجد أثناء رسم الشخصية، وامشي لأشغالي ويبقى المساعدن لمعاجلة أى طارئ!

-       وإيه علاقتك بمروان مروان حامد؟

علاقتى بيه كانت من خلال إعلان قمنا بالعمل فيه مع بعض للمصرية للاتصالات من 3 سنين.

-       مكنتش خايف من التجربة?

 كان التخوف في مدى أهمية التاتو في الرواية والقدرة على تطبيقه بطريقة لا تقل عنها، ومايظهرش في الفيلم بمستوى أقل فيضعف منه، وعشان كده طلب مني أن أقدم لهم أمثلة فيها أشكال عربية، وفي الوقت ده كنت برة مصر، وقمت بعمل نموذج وأرسلته ليهم، وساعدني في ده إن البنت اللي قمت برسم تاتو على جسمها كان بالفعل فيه تاتو عاملاه، فظهر الفرق بين عملي وبين التاتو على جسم البنت، وبعد ما بعت ليهم النموذج عرضوا عليا نسخة من سيناريو الرواية، وفى الواقع كنت قرأتها بالفعل، وكان الاتفاق فى البداية إني أقوم بعمل التاتو فى الفيلم فقط، ولكن بعد كده اتفقنا عن حجم المؤثرات الخاصة اللي بيمتلئ بيها الفيلم، زي الطعنات والجروح اللى ظهرت فى شخصية "بسمة" و"مايا"

-       هل المؤثرات فى شخصية خالد الصاوى كانت سهلة؟

 الفنان خالد الصاوى فى شخصية "شريف الكردى" كان بحاجة لمؤثرات كتيرة جدًا خاصة إنه بيظهر بثلاث شخصيات "نائل والمأمون وشريف" وهو أكتر شخصية أجهدتنى، بين كل مشهدين كنا بنحتاج نظهره بطريقة مختلفة.

-       إيه المدة التى خدتها فى رسم الشخصيات؟

رسمت شخصية "ديجا" مرة واحدة، في يوم، أما شخصية خالد الصاوى خدت أسابيع حسب المشاهد، وفى كل مشهد كنا بنرسم جزء معين، ما بين الكف والجسم وكنا بنستعين بالشكل الثابت في اسكتشات عشان تنفيذها فى كل مرة، والجزء ده تحديدًا كان من الحاجات المقلقة جدًا في الشغل، وهو القدرة على تنفيذه فى كل مرة بنفس

 المستوى من غير وجود أى اختلافات بين كل مشهد والتاني.

-       إيه المشكلات اللي واجهتك أثناء العمل فى "الفيل الأزرق"؟

لما اتعرض عليا الانضمام لفريق العمل، كنت مرتبط بفيلم "الحرب العالمية الثالثة"، وفيلم فيلا 69 لخالد أبو النجا، وعشان كده للأسف الشديد مقعدتش وقت طويل أثناء تصوير "الفيل الأزرق"، وكنت أتمنى إن توقيت الأفلام دي يجي فى وقت مختلف، وأتفرغ لكل فيلم فيهم عشان أخرج كل طاقتي في كل فيلم.

-       إيه المشاكل اللي بتواجهك بشكل عام فى مجال صناعة السينما؟

المشاكل بتتمثل فى إجراءات دخول المواد اللي باستخدمها وإن دخول المواد دي صعب ومكلف جدًا، فلو الحكومة جادة في النهوض بصناعة السينما، لازم يتم تسهيل الإجراءات، خاصة الجمارك، أى مادة بنستخدمها لازم تمر الأول على وزارة الصحة، عشان ناخد موافقة، ودي حاجة بتعيق العمل خاصة.

-       شاركت فى مسلسلات رمضان السنة اللي فاتت؟ 

أكيد! ابن حلال، وكلام على ورق، وشارع عبد العزيز، والصياد، ولكن مش بشارك كماكير تجميل، دايمًا بشاك في صناعة الأحداث أو الشخصيات زي المعارك.